തിരുവനന്തപുരം : സംസ്ഥാനത്തെ അങ്കണവാടി കെട്ടിടങ്ങളുടെ സുരക്ഷ ഉറപ്പുവരുത്താന്‍ വനിതാ ശിശുവികസന ഡയറക്ടര്‍ക്ക്‌ മന്ത്രി വീണ ജോര്‍ജിന്റെ നിര്‍ദ്ദേശം. എല്ലാ അങ്കണവാടി കെട്ടിടങ്ങളുടെയും ഫിറ്റ്‌നസ്‌ സര്‍ട്ടിഫിക്കറ്റ് 10 ദിവസത്തിനകം ഹാജരാക്കാനാണ്‌ നിര്‍ദ്ദേശം. നിലവിലെ കെട്ടിടം സുരക്ഷിതമല്ലെങ്കില്‍ മറ്റൊരു കെട്ടിടം ഉടന്‍ കണ്ടെത്തി അവിടേക്ക്‌ അങ്കണവാടി മാറ്റി പ്രവര്‍ത്തിക്കാനും നിര്‍ദ്ദേശം നല്‍കി.
കോട്ടയം വൈക്കത്ത്‌ അങ്കണവാടി കെട്ടിടം ഇടിഞ്ഞുവീണ്‌ പരിക്കേറ്റ മൂന്നരവയസുകാരന്‌ കോട്ടയം ഐസിഎച്ചില്‍ സൗജന്യ ചികിതിസ ഉറപ്പുവരുത്തും. കൂടാതെ കുട്ടിക്ക്‌ അടിയന്തിര ധനസഹായമായി ഒരുലക്ഷം രൂപ അനുവദിക്കുമെന്നും മന്ത്രി പറഞ്ഞു. സംഭവത്തില്‍ വനിത ശിശുവികസന വകുപ്പ്‌ ഡയറക്ടറോട്‌ റിപ്പോര്‍ട്ടു തേടുകയും കര്‍ശന നടപടികള്‍ സ്വീകരിക്കാന്‍ മന്ത്രി നിര്‍ദ്ദേശം നല്‍കുകയും ചെയ്തു.
ഇതിന്റെ അടിസ്ഥാനത്തില്‍ സംഭവത്തില്‍ ഉത്തരവാദിയായ ഐസിഡിഎസ്‌ സൂപ്രണ്ടിനെ സര്‍വീസില്‍ നിന്നും സസ്‌പെന്‍ഡ്‌ ചെയ്തു. ജില്ലാ വനിതാ ശിശുവികസന ഓഫീസര്‍, പ്രോഗ്രാം ഓഫീസര്‍, ശിശുവികസന പദ്ധതി ഓഫീസര്‍ എന്നിവരോട്‌ വിശദീകരണം തേടാനും നടപടി സ്വീകരിച്ചു.
