കാസര്‍കോട്‌: പരപ്പയില്‍ റബ്ബര്‍തോട്ടത്തില്‍ മൃതദേഹാവശിഷ്ടം കണ്ടെത്തി. ഒരുമാസത്തോളം പഴക്കമുളള അസ്ഥികൂടമാണ്‌ കണ്ടെത്തിയത്‌. വെളളരിക്കുണ്ട്‌ പോലീസ്‌ സ്ഥലത്തെത്തി അന്വേഷണം ആരംഭിച്ചു. ബ്ലാല്‍ പഞ്ചായത്തിലെ ഇടത്തോട്‌ മുണ്ടപ്ലാവിലെ സ്വകാര്യ വ്യക്തിയുടെ റബ്ബര്‍ തോട്ടത്തിലാണ്‌ പുരുഷന്റെ അസ്ഥികൂടം കണ്ടെത്തിയത്‌. തോട്ടത്തില്‍ പുല്ലരിയാന്‍ പോയ ആളാണ്‌ മൃതദേഹത്തിന്റെ അവശിഷ്ടങ്ങള്‍ കണ്ടത്‌.
തുടര്‍ന്ന്‌ നാട്ടുകാരെയും പോലീസിനെയും വിവരമറിയിക്കുകയായിരുന്നു. ഒരുമാസത്തോളം പഴക്കമുളള മൃതദേഹത്തിന്റെ തല വേര്‍പെട്ട നിലയിലാണ്‌. തൊട്ടടുത്ത മരത്തില്‍ തുണി കെട്ടിയ നിലയില്‍ കണ്ടെത്തിയതിനാല്‍ തൂങ്ങി മരിച്ചതാണോയെന്ന്‌ സംശയിക്കുന്നു.
നായിക്കയത്തുനിന്ന്‌ ഒരുമാസം മുമ്പ്‌ കോട്ടക്കുഴിയില്‍ കുഞ്ഞുമോന്‍ എന്നയാളെ കാണാതായിരുന്നു. മൃതദേഹം ഇയാളുടെയാണോയെന്ന്‌ സംശയമുണ്ടെന്നും വസ്‌ത്രങ്ങള്‍ ബന്ധുക്കള്‍ തിരിച്ചറിഞ്ഞിട്ടുണ്ടെന്നും വാര്‍ഡ്‌ മെമ്പര്‍ ജോസഫ്‌ വര്‍ക്കി പറഞ്ഞു. വെളളരിക്കുണ്ട്‌ സിഐയുടെ നേതൃത്വത്തില്‍ പോലീസ്‌ സംഘം സ്ഥലത്തെത്തി പരിശോധന നടത്തി. അസ്ഥികൂടം പരിയാരം മെഡിക്കല്‍ കോളേജില്‍ തുടര്‍ പരിശോധനകല്‍ക്കായി എത്തിച്ചു.
