ഇടുക്കി: കൊലപാതകം കെ സുധാകരന്റെ തലയിൽ കെട്ടിവെക്കുന്നത് ശരിയായ നടപടിയല്ലെന്ന് പ്രതിപക്ഷ നേതാവ് വിഡി സതീശൻ. കെപിസിസി പ്രസിഡന്റ് കെ സുധാകരനെതിരെ വ്യാപകമായ വിമർശനമുയരുന്ന സാഹചര്യത്തിലാണ് പ്രതിപക്ഷ നേതാവിന്റെ പ്രതികരണം. കൊലപാതകത്തെ കോൺഗ്രസ് ഒരിക്കലും പിന്തുണക്കുന്നില്ലെന്നും കൊലപാതകത്തിന്റെ ഭാഗമായി സിപിഎം വ്യാപകമായി അക്രമം നടത്തുന്നത് അംഗീകരിക്കാനാകില്ലെന്നും അദ്ദേഹം വ്യക്തമാക്കി. ക്യാമ്പസുകളിലെ അതിക്രമങ്ങൾ വളരെയധികം ഉയർന്ന തലത്തിലാണ്.
ക്യാമ്പസുകളിൽ അക്രമം രൂക്ഷമായതിനാൽ വിദ്യാർഥികൾ പഠനം നിർത്തി പോകുന്ന സാഹചര്യമുണ്ട്. കേരളത്തിലെ കോൺഗ്രസ് അക്രമ ശൈലി സ്വീകരിച്ചിട്ടില്ല. കേരളത്തിൽ നടന്നിട്ടുള്ള രാഷ്ട്രീയ കൊലപാതകങ്ങളിൽ ഏറ്റവും കൂടുതൽ പ്രതികളായിട്ടുള്ളത് സിപിഎം പ്രവർത്തകരാണ്. തീവ്രവാദ സംഘടനകളേക്കാളും മികച്ച രീതിയിലാണ് സിപിഎം പ്രവർത്തിക്കുന്നത്. വിവിധ കൊലപാതക കേസുകളിൽ പ്രതികളായ സിപിഎം പ്രവർത്തകരെ അവർ തന്നെയാണ് സംരക്ഷിക്കുന്നത്. വിഡി സതീശൻ മാധ്യമങ്ങളോട് പറഞ്ഞു.
