നോയിഡ: നെഞ്ചിൽ തോക്ക് ചൂണ്ടി സെല്‍ഫിയെടുക്കാന്‍ ശ്രമിച്ച യുവാവ് അബദ്ധത്തില്‍ വെടിയേറ്റ് മരിച്ചു. ഗ്രേറ്റര്‍ നോയിഡ ധ്രംപുര സ്വദേശിയായ 22 വയസുകാരന്‍ സൗരവ് മാവിയാണ് മരിച്ചത്. സംഭവത്തില്‍ കൂടെയുള്ള സുഹൃത്തിനെ പോലീസ് കസ്റ്റഡിയിലെടുത്തു.
നകുല്‍ ശര്‍മയും സൗരവ് മാവിയും വര്‍ഷങ്ങളായി സുഹൃത്തുക്കളാണ്. ഇരുവരുടേയും സുഹൃത്തായ സച്ചിനെ കാണാന്‍ കാറില്‍ സഞ്ചരിക്കവെയാണ് സംഭവം. കാറില്‍ വച്ച്‌ തോക്ക് നെഞ്ചോട് ചേര്‍ത്തുവച്ച്‌ സെല്‍ഫിയെടുക്കാനുള്ള ശ്രമത്തിലായിരുന്നു സൗരവ്. ഇതിനിടെ അബദ്ധത്തില്‍ വെടിയേല്‍ക്കുകയായിരുന്നു.
വെടിയേറ്റ സൗരവിനെ അതേ കാറിൽ ഉടൻ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. സുഹൃത്ത് നകുല്‍ ശര്‍മ്മ തന്നെയാണ് വിവരം പോലീസിനെ അറിയിച്ചത്.
