കൊച്ചി: ഒപിഎം ഡ്രീം മീൽസ് സിനിമാസിൻ്റെ ബാനറിൽ ആഷിക് അബുവും,മൂണ്‍ഷോട്ട് എന്‍റര്‍ടെയ്ന്‍‍മെന്‍റ്സിന്‍റെ ബാനറിൽ സന്തോഷ് ടി കുരുവിളയും ചേർന്ന് നിർമ്മിക്കുന്ന ചിത്രത്തിൽ മലയാളത്തിന്റെ പ്രിയതാരങ്ങളായ ബിജു മേനോനും പാർവതി തിരുവോത്തും ഒന്നിക്കുന്നു. പ്രശസ്ത ഛായാഗ്രാഹകൻ സാനു ജോൺ വർഗീസ് സംവിധായകലോകത്തേക്ക് കടക്കുന്ന ചിത്രം കൂടിയാണിത് . ഷറഫുദ്ധീൻ,സൈജു കുറുപ്പ്, ആര്യ സലിം തുടങ്ങിയവരും ചിത്രത്തിൽ മുഖ്യകഥാപാത്രങ്ങളെ അവതരിപ്പിക്കുന്നുണ്ട്. കോട്ടയത്ത് ചിത്രീകരണം ആരംഭിച്ച ചിത്രം 2021 ജനുവരിയിൽ തിയേറ്ററിൽ റിലീസ് ചെയ്യാനാകുമെന്ന പ്രതീക്ഷയിലാണ് അണിയറപ്രവർത്തകർ.
ടേക്ക് ഓഫ്, ആൻഡ്രോയിഡ് കുഞ്ഞപ്പൻ വേർഷൻ 5.25, മാലിക്, വിശ്വരൂപം, തൂങ്കാവനം തുടങ്ങി മലയാളത്തിലും തമിഴിലും തെലുങ്കിലും ഹിന്ദിയിലും നിരവധി ചിത്രങ്ങളിൽ ഛായാഗ്രാഹകനായ വ്യക്തിയാണ് സാനു ജോൺ വർഗീസ്.
അതേസമയം ഹലാൽ ലൗ സ്റ്റോറിയാണ് പർവതിയുടേതായി അവസാനം റിലീസ് ചെയ്ത ചിത്രം. ചിത്രത്തിൽ ഗസ്റ്റ് റോളിലാണ് താരം എത്തുന്നത്. രാച്ചിയമ്മ, വർത്തമാനം എന്നീ ചിത്രങ്ങളാണ് പാർവതി തിരുവോത്ത് നായികയായി അണിയറയിൽ ഒരുങ്ങുന്ന മറ്റ് ചിത്രങ്ങൾ.
