ന്യൂഡൽഹി: ലോക് ഡൗൺ ഇളവുകൾ വന്നതിനു ശേഷം രാജ്യത്തെ വ്യാവസായിക ഉൽപാദന രംഗത്ത് മികച്ച പുരോഗതിയുണ്ടായതായി റിപ്പോർട് . കഴിഞ്ഞ 8 വർഷത്തെ മികച്ച വളർചയാണ് ഈ രംഗത്ത് പ്രകടമാകുന്നത് എന്നാണ് റിപ്പോർട് പറയുന്നത്.
കൊറോണ വൈറസ് ലോക്ക്ഡൗൺ നിയന്ത്രണങ്ങളിൽ ഇളവ് വരുത്തിയതിനാൽ ഇന്ത്യയിലെ വ്യാവസായിക പ്രവർത്തനം 2020 സെപ്റ്റംബറിൽ കഴിഞ്ഞ എട്ട് വർഷത്തിനിടയിലെ ഏറ്റവും ഏറ്റവും ഉയർന്ന വികാസമാണ് പ്രകടമാക്കുന്നത്. ഡിമാൻഡും ഉൽ‌പാദനവും വർദ്ധിച്ചുവെന്നും സ്വകാര്യ ഏജൻസിയുടെ സർവേ വ്യക്തമാക്കി.
സമ്പദ്‌വ്യവസ്ഥ വീണ്ടെടുപ്പിൻ്റെ ദിശയിലാണ് എന്നാണ് ഇതു നൽകുന്ന സൂചനയെന്ന് വിദഗ്ധർ പറയുന്നു. ഐ‌എച്ച്‌എസ് മാർ‌ക്കിറ്റ് സമാഹരിച്ച നിക്കി മാനുഫാക്ചറിംഗ് പർച്ചേസിംഗ് മാനേജർ‌സ് ഇൻ‌ഡെക്സ് 2020 സെപ്റ്റംബറിൽ 56.8 ലേക്ക് ഉയർന്നു. 2020 ഓഗസ്റ്റിൽ ഇത് 52 ആയിരുന്നു. 2012 ജനുവരിക്ക് ശേഷമുള്ള ഏറ്റവും ഉയർന്ന സ്ഥിതിയാണിത്.
ഇന്ത്യയിലെ വ്യവസായിക ഉത്പാദനം ശരിയായ ദിശയിലേക്ക്‌ നീങ്ങുകയാണെന്ന് ഐ‌എച്ച്‌എസ് മാർ‌ക്കിറ്റിലെ ഇക്കണോമിക്സ് അസോസിയേറ്റ് ഡയറക്ടർ പോളിയാന്ന ഡി ലിമ പറയുന്നു. എന്നാൽ, കാര്യമായ തിരിച്ചുവരവ് ഉണ്ടായിരുന്നിട്ടും, കമ്പനികൾ തുടർച്ചയായ ആറാം മാസവും ജീവനക്കാരെ വെട്ടിക്കുറക്കുകയാണ് ചെയ്തിട്ടുള്ളത്.
